Merkato “e çmendur” në Kategorinë Superiore, bëhen 155 lëvizje në hyrje dhe dalje.

Për trajnerët, shpesh janari cilësohet si muaji delikat për transferimet, mirëpo shumica e klubeve të Superiores e ka parë si shpëtimtar.

Dje ishte dita e fundit e merkatos dhe surprizat nuk munguan. Skënderbeu e kishte ruajtur pikërisht në limit goditjen e madhe, duke blerë sulmuesin nigerian Xhejms Adeniji, që prej tre sezonesh po shkëlqente te Laçi. Ka qenë një muaj i mbushur me transferime surprizë, por edhe me dy shitje rekord: Peter Olainka te Genti në Belgjikë dhe Bernard Berisha te Anzhi në Rusi.

Korçarët fituan afro 1.6 milionë euro nga dy “xhevahirët”, ndërsa i zëvendësuan me emra të afrimuar si Plaku, Orelesi, Nafiu dhe së fundmi Xhejms. Partizani ishte gjithashtu goditës, duke rikthyer Emiljano Vilën, ndërsa afrimet e mëdha që mbetën për t’u parë janë ato të brazilianit Filipe Gomes dhe argjentinasit Agustin Torasa.

Në ditën e fundit u zyrtarizua edhe mbrojtësi vlonjat, Franc Veliu. Të kuqtë ndihen krenarë për merkaton e bërë, edhe sepse kanë fituar dy derbe me Tiranën për shërbimet e Sodiq Atandës dhe Mario Dajsinanit. Nuk kanë munguar duelet e fshehta mes klubeve.

Në fillim, Orelesi u konfirmua te Flamurtari, por Skënderbeu e “rrëmbeu”. Mirëpo, më parë vlonjatët kishin fituar sfidën me korçarët për mbrojtësin Ilir Berisha. Ashtu siç kanë bërë në pesë sezonet e fundit, edhe këtë herë në Vlorë merkatoja ka qenë e çmendur.

Eksodit masiv prej financave, drejtuesit kuqezi iu përgjigjen me 9 afrime të rëndësishme. Brazili dhe Kosova ishin tregjet e preferuara jo vetëm për Flamurtarin, por thuajse në të gjitha skuadrat.

Ato që kanë lëvizur më pak në muajin që lamë pas kanë qenë Tirana, Teuta, Vllaznia dhe Laçi. Mirë- po, emrat e afruar janë bindës, veçanërisht transferimi i Nijaz Lenës te durrsakët. Bardheblutë presin që makthi i golave të zgjidhet nga një dyshe braziliane (Hugo Almeida, Aleks Uillian), nga e cila pritet shumë. Edhe Kukësi nuk u ka shpëtuar ndryshimeve të shumta.

Zbulimi i skuadrës së Klodian Duros mund të quhet sulmuesi nga Tetova, Izair Emini, i cili që në debutim shënoi dy gola. Vllaznia e Armando Cungut “peshkoi” te Partizani dy lojtarë me eksperiencë: mbrojtësin Endri Vrapi dhe mesfushorin Alsid Tafili.

Shkodranët kërkuan pa fund për sulmues, por nuk e gjetën. Ndërsa Bylisi bëri goditje të rëndësishme, duke rikthyer portierin Frashëri dhe sulmuesin Izuçuku, pa harruar mbrojtësin me eksperiencë, Julian Brahja. Tërbuni i vendit të fundit ishte një kantier, plot 25 lëvizje, por më shumë largime. Një skuadër nga e para, që duket se do ta ketë shumë të vështirë mbijetesën.

Përgatiti: JORGIS MEMO

NDIQE LIVE "PANORAMA TV"

---